Xocalı rayon İcra Hakimiyyətinin başçısı Şahmar Usubov hər həftə vətəndaşlarla görüşür, təklif və problemləri dinləyir, onların həlli istiqamətində müvafiq tapşırıqlar verir. Dekabrın 8-də Goranboy rayonunun Börü qəsəbəsində müvəqqəti məskunlaşmış əsasən Cəmilli kəndindən olan sakinlərlə keçirilən növbəti görüşdə Şahmar Usubovla birgə, rayonun hüquq-mühafizə orqanlarının, idarə, müəssisələrin rəhbərləri də iştirak etdilər.         Xocalı rayon İHB-nın Cəmilli kənd İƏD-si üzrə nümayəndəsi Ramiz Qəhrəmanov çıxış edərək qəsəbədəki ümumi problemləri rayon icra hakimiyyəti başçısının diqqətinə çatdırdı. Bildirdi ki, qəsəbədaxili yolların şebellənməsi, məişət tullantılarının daşınması üçün küçələrdə zibil qutularının qoyulması, internət xəttinin çəkilməsi, qəsəbənin suvarma suyu ilə təmin olunması, evlərin seldən qorunması üçün çəkilmiş su arxlarının təmizlənməsi qəsəbə sakinlərini narahat edən əsas problemlərdir.                 Rayon İcra Hakimiyyətinin başçısı Şahmar Usubov səyyar görüşdə sakinlərə ilk öncə Azərbaycan Respublikasının Prezidenti cənab İlham Əliyev tərəfindən aparılan uğurlu daxili və xarici siyasət, eləcə də əhalinin sosial müdafiəsinə və rifah halının yüksəldilməsinə yönəlmiş dövlət qərarları haqqında ətraflı məlumat verdi.       Səyyar qəbulda müraciətlər əsasən işlə təminolunma, ayrı təsərrüfat kimi qeydiyyata alınma və digər məsələlərlə bağlı oldu. Sakinlər həmçinin qaz limitinin dağ rayonlarında daha artıq olmasının zəruriliyini də səsləndirdilər.           İcra başçısı qəbulda iştirak edən sakinləri dinləyərək onların qaldırdıqları problemlərin həll olunması üçün müvafiq tapşırıqlar verdi.